មន្ត្រីយោធាម្នាក់ ដកកាំភ្លើងខ្លីបាញ់សម្លាប់ពលរដ្ឋ បណ្ដាលឱ្យស្លាប់ទាំងកណ្ដាលហ្វូងមនុស្ស នៅស្រុកក្រគរ ខេត្តពោធិ៍សាត់

មន្ត្រីយោធាម្នាក់ ដកកាំភ្លើងខ្លីបាញ់សម្លាប់ពលរដ្ឋ បណ្ដាលឱ្យស្លាប់ទាំងកណ្ដាលហ្វូងមនុស្ស នៅស្រុកក្រគរ ខេត្តពោធិ៍សាត់

(សូមអានបន្ត)

ក្រសួងប្រៃសណីយ៍ និងទូរគមនាគមន៍ យកចិត្តទុកដាក់ពង្រឹងសមត្ថភាពមន្ដ្រីថ្នាក់ក្រោមជាតិ ដើម្បីប្រសិទ្ធភាពអនុវត្តការងារ

(បាត់ដំបង)៖ ដោយឈរលើគោលការណ៍ កែទម្រង់ស៊ីជម្រៅ ក្នុងវិស័យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានយកចិត្តទុកដាក់ជាខ្លាំង ក្នុងការអភិវឌ្ឍធនធានមនុស្សទាំងនៅថ្នាក់ជាតិ ក៏ដូចជាថ្នាក់ក្រោមជាតិ។

ជាពិសេស ដើម្បីផ្តល់លទ្ធភាព ឲ្យថ្នាក់ក្រោមជាតិអាចអនុវត្តការងារ បានកាន់តែមានប្រសិទ្ធភាព ក្រោមការផ្តួចផ្តើមរបស់ លោករដ្ឋមន្ត្រីក្រសួង បានបង្កើតឲ្យមាន ការរៀបចំជាសិក្ខាសាលា ស្តីពីការពង្រឹងសមត្ថភាពអនុវត្តការងារ នៅថ្នាក់មន្ទីរប្រៃសណីយ៍ និងទូរគមនាគមន៍ ដែលជាវគ្គបណ្តុះបណ្តាលមានបំណង៖

១៖ បង្កើនភាពស្និតស្នាល រវាងមន្ត្រីថ្នាក់ជាតិ និងថ្នាក់ក្រោមជាតិ
២៖ ឲ្យមន្ត្រីថ្នាក់ក្រោមជាតិអាចចាប់យកព័ត៌មាន ចំណេះដឹង ការយល់ដឹងថ្មីៗ បានត្រឹមត្រូវបន្ថែមជាប្រចាំថ្ងៃ ឲ្យទាន់បច្ចុប្បន្នភាពវិវត្តជឿនលឿន នៃបច្ចេកវិទ្យាសម័យថ្មី
៣៖ ឲ្យថ្នាក់ក្រោមជាតិអនុវត្តតួនាទី និងភារកិច្ចដែលក្រសួងបានប្រគល់ជូន មានភាពច្បាស់លាស់ និង
៤៖ ផ្តល់គន្លឹះ និងបទពិសោធន៍ ដើម្បីដោះស្រាយប្រកបដោយការច្នៃប្រឌិត និងមានប្រសិទ្ធភាពចំពោះរាល់បញ្ហាប្រឈមនានា មានចំពោះមុខ ដែលមន្ទីរ ប.ទ.កំពុងជួបប្រទះសព្វថ្ងៃ។

សិក្ខាសាលានេះ ត្រូវបានរៀបចំសម្រាប់មន្ទីរប្រៃសណីយ៍ និងទូរគមនាគមន៍ ២៤ខេត្ត ទូទាំងប្រទេស ដោយចែកជា៤តំបន់ ហើយតំបន់នីមួយៗ មានការអញ្ជើញប្រមូលផ្តុំពីថ្នាក់ប្រធានមន្ទីរ រហូតដល់ការិយាល័យ មកពី០៦មន្ទីរប្រៃសណីយ៍ និងទូរគមនាគមន៍ខេត្ត។

ដំណើរការ នៃវគ្គបណ្តុះបណ្តាល ត្រូវបានធ្វើឡើង ដោយមានការចូលរួមសហការ របស់គ្រូដែលជាថ្នាក់ដឹកនាំ និងមន្ត្រីរាជការ ដែលមានជំនាញ និងបទពិសោធន៍ការងារទាក់ទង នឹងប្រធានបទនីមួយៗ។

វិធីសាស្ត្របណ្តុះ បណ្តាលរួមមាន៖ ការធ្វើបទបង្ហាញ សំនួរ/ចម្លើយ ការពិភាក្សា ការធ្វើលំហាត់ជាក្រុម ការចែករំលែកបទពិសោធន៍ ការត្រួតពិនិត្យការយល់ដឹង ពីមេរៀនរបស់សិក្ខាកាម ក៏ដូចជាការទទួលយកយោបល់ត្រឡប់វិញ ពីសិក្ខាកាមជាប្រចាំថ្ងៃផងដែរ។

ថ្នាក់ដឹកនាំក្រសួងជារដ្ឋលេខាធិការចំនួន៤រូប ជាអ្នកអនុម័ត លើខ្លឹមសារមេរៀន។ រដ្ឋលេខាធិការ និងអនុរដ្ឋលេខាប្រចាំតំបន់ ជាអ្នកដឹកនាំដំណើរការ នឹងធ្វើការត្រួតពិនិត្យគុណភាព នៃសិក្ខាសាលា និងវាយតម្លៃការចូលរួម របស់សិក្ខាកាមជាប្រចាំថ្ងៃ។

ក្រុមសម្របសម្រួល ជាអ្នករៀបចំគម្រោងចំណាយ ជ្រើសរើស រើសទីកន្លែងដំណើរការសិក្ខាសាលា ចាត់អញ្ជើញសិក្ខាកាមមកចូលរួម និងបូកសរុបរបាយការណ៍ ប្រចាំថ្ងៃជូនប្រធានប្រចាំតំបន់។

ជាក់ស្តែងសិក្ខាសាលា ត្រូវបានចាប់ផ្តើមប្រារព្ធមុនគេនៅតំបន់២ នាព្រឹកថ្ងៃទី១០ ដល់ថ្ងៃទី១៤ ខែសីហា ឆ្នាំ២០២០ មានរយៈពេល៥ថ្ងៃ នៅក្រុងបាត់ដំបង ក្រោមអធិបតីភាព លោក ខាយ ឃុនហេង រដ្ឋលេខាធិការតំណាងលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក្នុងពិធីបើក-បិទ។

ព្រមទាំងដឹកនាំ ជាមួយក្រុមការងារ ដើម្បីលើកទឹកចិត្ត ដល់ដំណើរការសិក្ខាសាលា ដែលបានធ្វើការបណ្តុះបណ្តាល លើប្រធានបទចំនួន២២ សម្រាប់ផ្តល់ជាមូលដ្ឋាន ដោះស្រាយនូវរាល់បញ្ហាប្រឈមជាក់ស្តែងនានា ដល់សិក្ខាកាមចំនួន៥៣នាក់ (ស្រី២៤នាក់) មកពីមន្ទីរប្រៃសណីយ៍ និងទូរគមនាគមន៍ ខេត្តចំនួន៦ ក្នុងតំបន់២ និង៣នាក់ មកពីមន្ទីរប្រៃសណីយ៍ និងទូរគមនាគមន៍ខេត្តចំនួន៣ (ក្រៅតំបន់២)។

តាមរយៈការបំពេញទម្រង់សំនួរ វាយតម្លៃក្នុងដំណើរការនៃអង្គសិក្ខាសាលានៅតំបន់២នេះ សិក្ខាកាមស្ទើរទាំងអស់ បានបង្ហាញនូវការពេញចិត្ត ចំពោះដំណើរការ រៀបចំសិក្ខាសាលាទាំងមូល និងបានសំណូមពរឲ្យបន្តរៀបចំសិក្ខាសាលាបែបនេះ បានញឹកញាប់ ដើម្បីផ្តល់ឱកាស ឲ្យមន្ត្រីរាជការបានចូលរួមរៀនគ្រប់ៗគ្នា ទទួលបាននូវការយល់ដឹងបន្ថែម ជួយជំរុញការអនុវត្តការងារមានប្រសិទ្ធភាព។

ជារួមលទ្ធផលដែលទទួលបាន ក្នុងអង្គសិក្ខាសាលានាពេលនេះ ពិតជាមានសារៈសំខាន់ណាស់សម្រាប់ ថ្នាក់ដឹកនាំក្រសួង បានជ្រាបនិងបង្កើតបានជាថ្មីបន្ថែមទៀត នូវចក្ខុវិស័យ ក្នុងការបណ្តុះបណ្តាលមន្ត្រី ឲ្យកាន់តែមានគុណភាពខ្ពស់ មានវិជ្ជាជីវៈច្បាស់លាស់ និងមានមូលដ្ឋានគន្លឹះ សម្រាប់ជួយដោះស្រាយបញ្ហាប្រឈម ក្នុងការអនុវត្តការងារនៅថ្នាក់ក្រោមជាតិ។

ដើម្បីជាការលើទឹកចិត្តចំពោះវត្តមានដ៏ទៀងទាត់ បានខិតខំព្យាយាមសិក្សារៀនសូត្ររបស់សិក្ខាកាម ដែលជាថ្នាក់ដឹកនាំ និងមន្ត្រីទទួលបន្ទុការងារមកពីមន្ទីរ ប.ទ ខេត្ត នៅទីតាំងតំបន់២ ក្រុងបាត់ដំបងនេះ គណៈអធិតីក៏បានចែក ផ្តល់ជូននូវវិញ្ញាបនប័ត្របញ្ជាក់ការសិក្សា ដល់សិក្ខាកាមទាំង៥៣រូប ទុកជាអនុស្សាវរីយ៍ នៅថ្ងៃបិទនៃអង្គសិក្ខាសាលា។

សូមជម្រាបជូនថា បន្ទាប់ពីការប្រារព្ធធ្វើនៅតំបន់២រួចហើយ សិក្ខាសាលានឹងបន្តប្រព្រឹត្តទៅតាមផែនការ នៅតំបន់១ តំបន់៣ និងបញ្ចប់នៅតំបន់៤៕

(សូមអានបន្ត)

ឧបនាយករដ្ឋមន្រ្តីសេដ្ឋកិច្ចកម្ពុជា អរគុណគ្រប់ដៃគូអភិវឌ្ឍន៍ ដែលបានផ្តល់ជំនួយហិរញ្ញប្បទាន ដល់រាជរដ្ឋាភិបាល ក្នុងការទប់ស្កាត់ជំងឺកូវីដ-១៩

(ភ្នំពេញ)៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងអំណរគុណ ដល់គ្រប់ដៃគូអភិវឌ្ឍន៍ ដែលបានផ្តល់ជំនួយហិរញ្ញប្បទាន ដល់រាជរដ្ឋាភិបាលកម្ពុជា ក្នុងការទប់ស្កាត់ និងបង្កការការរាតត្បាតនៃជំងឺកូវីដ-១៩ និងការស្តារ និងជំរុញកំណើនសេដ្ឋកិច្ច បន្ទាប់ពីជំងឺកូវីដ-១៩។

ការថ្លែងអំណរគុណនេះ ក្នុងឱកាសដែល ឧបនាយករដ្ឋមន្រ្តី អូន ព័ន្ធមុនីរ័ត្ន ប្រធានគណៈកម្មាធិការ ដឹកនាំការងារកែទម្រង់ ការគ្រប់គ្រង ហិរញ្ញវត្ថុសាធារណៈ ដឹកនាំកិច្ចប្រជុំគណៈកម្មាធិការ ដឹកនាំការងារកែទម្រង់ ការគ្រប់គ្រងហិរញ្ញវត្ថុសាធារណៈ ជាមួយដៃគូអភិវឌ្ឍន៍ នាថ្ងៃទី០៧ ខែកក្កដា ឆ្នាំ២០២០ នៅទីស្ដីការក្រសួងសេដ្ឋកិច្ច។

កិច្ចប្រជុំនេះ ពិភាក្សាលើ៖ ១៖ របាយការណ៍វឌ្ឍនភាពប្រចាំឆ្នាំ ២០១៩ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៣ និង
២៖ ការឆ្លើយតបទៅនឹងមតិយោបល់របស់ដៃគូអភិវឌ្ឍន៍ លើរបាយការណ៍វឌ្ឍនភាពប្រចាំឆ្នាំ ២០១៩ នៃការអនុវត្ត កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៣។

តាមរយៈការរៀបចំជាប្រព័ន្ធវីឌីអូ, កិច្ចប្រជុំនេះ មានការអញ្ជើញចូលរួមពីសំណាក់ ថ្នាក់ដឹកនាំ និងជាសមាជិកគណៈកម្មាធិការ ដឹកនាំការងារកែទម្រង់ ការគ្រប់គ្រង ហិរញ្ញវត្ថុសាធារណៈ, តំណាងដៃគូអភិវឌ្ឍន៍ (សហភាពអឺរ៉ុប ធនាគារពិភពលោក ធនាគារអភិវឌ្ឍន៍អាស៊ី មូលនិធិរូបិយវត្ថុអន្តរជាតិ និងអង្គការយូនីសេហ្វ) និងតំណាងអង្គការក្រៅរដ្ឋាភិបាល ផងដែរ។

១៖ វឌ្ឍនភាពប្រចាំឆ្នាំ ២០១៩ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣៖ ការអនុវត្តការងារកែទម្រង់ ការគ្រប់គ្រងហិរញ្ញវត្ថុសាធារណៈប្រចាំឆ្នាំ២០១៩ សម្រេចបានវឌ្ឍនភាពល្អប្រសើរ លើគ្រប់ផ្នែកនៃក្របខណ្ឌផែនការសកម្មភាពរួម ដំណាក់កាលទី៣ ក្នុងនោះ៖

* «ភាពជឿទុកចិត្តនៃថវិកា» នៅតែអាចរក្សាបានជាសារវន្ត ដោយសារប្រសិទ្ធភាពនៃការអនុវត្តផែនការប្រមូលចំណូលសម្រេចបាន១៣១% នៃច្បាប់ថវិកាឆ្នាំ២០១៩ ឬស្មើ ២៧,៧៤០ប៊ីលានរៀល និងចំណាយថវិកាជាតិសម្រេចបាន៩៩.០៥% ឬស្មើ ២៣,៤៦៨ ប៊ីលានរៀល។

* «ប្រព័ន្ធគណនេយ្យភាពហិរញ្ញវត្ថុ» ត្រូវបាន និងកំពុងកសាងតាមរយៈ ការដាក់ឲ្យប្រើប្រាស់ប្រព័ន្ធបច្ចេកវិទ្យាព័ត៌មាន សម្រាប់ការគ្រប់គ្រងហិរញ្ញវត្ថុសាធារណៈ (FMIS) ជាផ្លូវការ នៅគ្រប់អគ្គនាយកដ្ឋាននៃក្រសួងសេដ្ឋកិច្ច និងហិរញ្ញវត្ថុ, រតនាគារទាំង ២៥ រាជធានី-ខេត្ត, មន្ទីរសេដ្ឋកិច្ច និងហិរញ្ញវត្ថុទាំង២៥រាជធានី-ខេត្ត និងក្រសួង-ស្ថាប័នចំនួន៣៧។

* «ការផ្សារភ្ជាប់ថវិកាទៅនឹងគោលនយោបាយ» បាន និងកំពុងផ្លាស់ប្តូរប្រព័ន្ធថវិកាកម្ពុជា តាមរយៈការពង្រឹង និងពង្រីកការអនុវត្តថវិកាកម្មវិធី ជាមូលដ្ឋានគ្រឹះសម្រាប់ក្រសួង-ស្ថាប័ន ប្រើប្រាស់ថវិកាជាឧបករណ៍សម្រាប់ ជំរុញការអភិវឌ្ឍតាមវិស័យ។

គិតត្រឹមឆ្នាំ២០១៩, ថវិកាកម្មវិធីត្រូវបានដាក់ឲ្យអនុវត្តគ្រប់ក្រសួង-ស្ថាប័ន និងរដ្ឋបាលខេត្តចំនួន១៨។ រដ្ឋបាលរាជធានី-ខេត្តផ្សេងទៀត នឹងត្រូវដាក់ឲ្យអនុវត្ត ជាបន្តបន្ទាប់រហូតដល់ឆ្នាំ២០២១។

* «សម្រាប់ការត្រៀមខ្លួនជំហានបន្ទាប់ ឬ គណនេយ្យភាពសមិទ្ធកម្ម», ក្រសួងសេដ្ឋកិច្ច និងហិរញ្ញវត្ថុ បាននិងកំពុងរៀបចំច្បាប់ ស្តីពីប្រព័ន្ធគ្រប់គ្រងហិរញ្ញវត្ថុថ្មី, កែសម្រួលអនុក្រឹត្យលេខ៨១អនក្រ.បក ចុះថ្ងៃទី១៦ ខែវិច្ឆិកា ឆ្នាំ១៩៩៥ ស្តីពីការបង្កើតការត្រួតពិនិត្យហិរញ្ញវត្ថុ លើការចំណាយថវិការដ្ឋ នៅតាមក្រសួង ខេត្ត-ក្រុង ក្រុងស្វយ័ត រាជធានីភ្នំពេញ និងអង្គការសាធារណៈ និងអនុក្រឹត្យលេខ ៨២ អនក្រ.បក ចុះថ្ងៃទី ១៦ ខែ វិច្ឆិកា ឆ្នាំ ១៩៩៥ ស្តីពីបទបញ្ជាទូទៅ នៃគណនេយ្យសាធារណៈ។

ទន្ទឹមនេះ, រាជរដ្ឋាភិបាលកម្ពុជា បានដាក់ឲ្យអនុវត្តយុទ្ធសាស្រ្តនៃការកែទម្រង់ប្រព័ន្ធថវិកាឆ្នាំ ២០១៨-២០២៥, យុទ្ធសាស្រ្តកៀរគរចំណូលឆ្នាំ ២០១៩-២០២៣, យុទ្ធសាស្រ្តនៃការកែទម្រង់ ប្រព័ន្ធថវិការដ្ឋបាលថ្នាក់ក្រោមជាតិឆ្នាំ ២០១៩-២០២៥, យុទ្ធសាស្រ្តនៃការកែទម្រង់ប្រព័ន្ធលទ្ធកម្មសាធារណៈឆ្នាំ ២០១៩-២០២៥, យុទ្ធសាស្រ្តស្តីពីការកែទម្រង់ប្រព័ន្ធគ្រប់គ្រងការ វិនិយោគសាធារណៈឆ្នាំ ២០១៩-២០២៥ និងយុទ្ធសាស្រ្តស្តីពីការគ្រប់គ្រងបំណុលសាធារណៈឆ្នាំ ២០១៩-២០២៣ ។
យុទ្ធសាស្រ្តនីមួយៗ មានផែនការសកម្មភាពលម្អិត ដើម្បីឱ្យការអនុវត្តប្រកបដោយស្មារតីទទួលខុសត្រូវ, ប្រសិទ្ធភាព និងស័ក្តិសិទ្ធភាព។

* ជាយន្តការសម្រាប់ការគាំទ្រ ការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ប្រកបដោយជោគជ័យ និងចីរភាព, ក.ស.ហ.វ. បានបណ្តុះបណ្តាល មន្រ្តីរាជការ នៃ ក.ស.ហ.វ. និងក្រសួង-ស្ថាប័នចំនួន ១,០៥៩រូប លើជំនាញសេដ្ឋកិច្ច និងហិរញ្ញវត្ថុ ហើយកំពុងរៀបចំការបណ្តុះបណ្តាលតាមប្រព័ន្ធអនឡាញ និងរៀបចំផែនការយុទ្ធសាស្រ្តស្តីពីការកសាងនិងអភិវឌ្ឍន៍សមត្ថភាព ក្នុងក្របខណ្ឌកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៤ ។

២៖ ការឆ្លើយតបទៅនឹងមតិយោបល់របស់ដៃគូអភិវឌ្ឍន៍ លើរបាយការណ៍វឌ្ឍនភាពប្រចាំឆ្នាំ២០១៩ នៃការអនុវត្តកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈ ដំណាក់កាលទី៣៖ ដើម្បីឆ្លើយតបទៅនឹងស្ថានភាពសេដ្ឋកិច្ចក្នុងបរិការណ៍នៃជំងឺកូវីដ-១៩ និងផ្អែកលើរបាយការណ៍វឌ្ឍនភាពប្រចាំឆ្នាំ ២០១៩ នៃការអនុវត្តកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣, ដៃគូអភិវឌ្ឍន៍ រួមគ្នាបានផ្តល់នូវមតិយោបល់ចំនួន ១៩ សម្រាប់ការពង្រឹងការគ្រប់គ្រងហិរញ្ញវត្ថុ សាធារណៈ ដោយគិតគូរពីការលើកកម្ពស់ភាពធន់នៃសង្គម (social resilience) តាមរយៈវិធានការគោលនយោបាយគ្រប់គ្រងវិបត្តិសេដ្ឋកិច្ចនិងសង្គម។

ជារួម, អង្គប្រជុំពិនិត្យឃើញថា ប្រព័ន្ធគ្រប់គ្រងហិរញ្ញវត្ថុសាធារណៈរបស់កម្ពុជា មានភាពរឹងមាំក្នុងការបង្ការទប់ស្កាត់វិបត្តិសេដ្ឋកិច្ច ដែលអាចកើតចេញពីកត្តាខាងក្រៅ។

ជាក់ស្តែង, ចំពោះមុខការថមថយនៃកំណើនសេដ្ឋកិច្ចដោយ សារការរីករាលដាលនៃជំងឺកូវីដ-១៩, អគ្គបណ្ឌិតសភាចារ្យ ឧបនាយករដ្ឋមន្រ្តី បានគូសបញ្ជាក់ថា គណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ បានរៀបចំយន្តការឆ្លើយតប ដោយបង្កើតនូវក្រុមការងារចំពោះកិច្ចចំនួន៤ ដើម្បី១៖ រៀបចំគោលនយោបាយថវិកា ហិរញ្ញវត្ថុ និងជំនួយសង្គម, ២៖ គ្រប់គ្រងការផ្គត់ផ្គង់ និងតម្លៃទំនិញយុទ្ធសាស្រ្ត, ៣៖ រៀបចំនិងគ្រប់គ្រងយន្តការជំនួយសង្គម និង ៤៖ រៀបចំកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រងនិងដោះស្រាយផលប៉ះពាល់។

ទន្ទឹមនឹងការរៀបចំយន្តការក្រុមការងារច្បាស់លាស់, ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា, រាជរដ្ឋាភិបាលកម្ពុជា ក៏បានដាក់ចេញជាបន្តបន្ទាប់នូវកញ្ចប់វិធានការគោលនយោបាយចំនួន៤ជុំ ដើម្បីអន្តរាគមន៍ ក្នុងការគ្រប់គ្រងផលប៉ះពាល់ចំពោះមុខ និងរក្សាលំនឹងនៃសេដ្ឋកិច្ចនិងសង្គមរួមមាន៖

១៖ ជួយដល់ក្រុមហ៊ុនដែលទទួលរងផលប៉ះពាល់ខ្លាំង ដើម្បីឲ្យក្រុមហ៊ុនទាំងនោះ អាចបន្តអាជីវកម្មបាន ក្នុងពេលដ៏លំបាកនេះ
២៖ ជួយដល់កម្មករនិយោជិក ក្នុងករណីត្រូវបាត់បង់ ឬត្រូវព្យួរការងារ ឲ្យមានលំនឹងជីវភាព និងអាចអភិវឌ្ឍន៍ជំនាញ ព្រមទាំងផលិតភាពការងាររបស់ខ្លួន សម្រាប់អនាគត
៣៖ ជួយទ្រទ្រង់លើកស្ទួយកំណើន ជាពិសេស ជួយដល់សហគ្រាសធុនតូច និងមធ្យម ដែលជាឆ្អឹងខ្នងនៃសេដ្ឋកិច្ចជាតិ
៤៖ កម្មវិធីជំនួយសង្គម ដើម្បីជួយសម្រាលទុក្ខលំបាក និងរក្សាលំនឹងជីវភាពប្រជាជន តាមរយៈការអនុវត្តកម្មវិធីផ្ទេរសាច់ប្រាក់ សម្រាប់ក្រុមគ្រួសារប្រជាជនក្រីក្រ ខ្វះខាត, កម្មវិធីសាច់ប្រាក់ពលកម្ម (cash for work), ការបណ្តុះបណ្តាលជំនាញរយៈពេលខ្លី ដើម្បីបង្កើនលទ្ធភាពបង្កើតអាជីវកម្មផ្ទាល់ខ្លួន និងឈានទៅចាប់ យកការងារក្នុងវិស័យថ្មី។
សម្រាប់ការគ្រប់គ្រងថវិកាឆ្នាំ២០២០នេះ, រាជរដ្ឋាភិបាលបានធ្វើវិចារណកម្មថវិកា ដោយផ្តោតអាទិភាពពិសេស លើការប្រយុទ្ធប្រឆាំងការរីករាលដាលនៃជំងឺកូវីដ-១៩ និងទប់ទល់ផលប៉ះពាល់អវិជ្ជមានមកលើសេដ្ឋកិច្ចជាតិ។ ការធ្វើវិចារណកម្មចំណាយ និងការពង្រឹងប្រសិទ្ធភាពចំណាយនេះ គឺដើម្បីពង្រឹងការគ្រប់គ្រង ចំណាយបន្ទុកបុគ្គលិក ឲ្យបានម៉ឺងម៉ាត់បំផុត ដោយអនុវត្តគោលការណ៍រើសថ្មី ត្រឹមស្មើនឹងចំនួនចូលនិវត្តន៍ ពោលគឺ «រក្សាចំនួនក្របខណ្ឌមន្ត្រីរាជការស៊ីវិល យោធា និងនគរបាល ដូចនៅក្នុងឆ្នាំ ២០១៩» និងធ្វើវិចារណកម្មចំណាយលើមុខសញ្ញាចំនួន ដែលមិនទាន់ចាំបាច់ ឬមិនទាន់ចំាបាច់ខ្លាំង, មិនសូវប៉ះពាល់សកម្មភាពការងារ និងមានសមាសធាតុនាំចូលខ្ពស់ ឬទាំងស្រុង ដើម្បីយកទៅបំពេញមុខចំណាយចំាបាច់ថ្មីៗ។

អគ្គបណ្ឌិតសភាចារ្យ ឧបនាយករដ្ឋមន្រ្តី បានផ្តល់អនុសាសន៍ណែនាំសមាជិកគណៈកម្មាធិការ ដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ និងក្រុមការងារ កែទម្រង់ការគ្រប់គ្រងហិរញ្ញវត្ថុសាធារណៈ នៅតាមអង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ និងបណ្តាក្រសួង-ស្ថាប័ន ឲ្យបន្តពង្រឹងការអនុវត្តកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈ និងបានស្វាគមន៍ ក៏ដូចជាវាយតម្លៃខ្ពស់ចំពោះតំណាងដៃគូអភិវឌ្ឍន៍ ដែលជានិច្ចកាលផ្តល់ នូវកិច្ចសហប្រតិបត្តិការល្អ រួមទាំង ផ្តល់ជាជំនួយបច្ចេកទេស និងធនធានហិរញ្ញវត្ថុ។

អគ្គបណ្ឌិតសភាចារ្យ ឧបនាយករដ្ឋមន្រ្តី ក៏កោតសរសើរ និងវាយតម្លៃខ្ពស់ចំពោះ ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួង-ស្ថាប័ន និងអង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ ដែលបានខិតខំបំពេញមុខងារ របស់ខ្លួនជាសេនាធិការ ជូន គ.ហ.ស ទាំងការងារដឹកនាំ, សម្របសម្រួល, គាំទ្រ និងត្រួតពិនិត្យ និងវាយតម្លៃវឌ្ឍនភាពកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ទាំងប្រចាំត្រីមាស និងប្រចាំឆ្នាំ ប្រកបដោយភាពគ្រប់ជ្រុងជ្រោយ និងឆ្លុះបញ្ចាំងទាំងទិដ្ឋភាពការងារកែទម្រង់ និងប្រព័ន្ធគ្រប់គ្រងហិរញ្ញវត្ថុសាធារណៈ ទាំងមូល៕

(សូមអានបន្ត)

សម្ដេចក្រឡាហោម ស ខេង បញ្ជាអភិបាលរាជធានី-ខេត្ត ឲ្យទប់ស្កាត់ការកាប់ទន្ទ្រានយកដីដោយខុសច្បាប់ នៅតំបន់ការពារធម្មជាតិ

(ភ្នំពេញ)៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បញ្ជាអភិបាលរាជធានី-ខេត្ត ត្រូវទប់ស្កាត់ឲ្យបានជាដាច់ខាត កុំឲ្យមានការរុករានទន្ទ្រានដីដោយខុសច្បាប់ ដើម្បីបង្ការកុំឲ្យក្លាយជាសង្គ្រាមដីធ្លី។ នេះបើតាមលិខិតផ្ញើជូនអភិបាលរាជធានី-ខេត្ត របស់សម្ដេចក្រឡាហោម ស ខេង ដែលបណ្ដាញព័ត៌មាន Fresh News ទទួលបាននៅព្រឹកថ្ងៃទី០៨ ខែកក្កដា ឆ្នាំ២០២០។

ដើម្បីអនុវត្តវិធានការទប់ស្កាត់ឲ្យមានប្រសិទ្ធភាព សម្ដេចក្រឡាហោម ស ខេង បានដាក់ចេញនូវការណែនាំដូចខាងក្រោម៖

*ត្រូវយកចិត្តទុកដាក់ក្នុងការគ្រប់គ្រងនូវទិន្នន័យ និងស្ថិតិប្រជាពលរដ្ឋ និងដីធ្លីដែលប្រជាពលរដ្ឋកំពុងកាន់កាប់ និងអាស្រ័យផលជាក់ស្តែងយូរឆ្នាំមកហើយ នៅលើទីតាំងដីដែលស្ថិត នៅក្នុងផែនទីតំបន់ការពារធម្មជាតិ និងគម្របព្រៃឈើនៅតាមខេត្តនានា ដើម្បីចាត់ចែងធ្វើការកាត់ឆ្វៀលដី និងផ្ដល់កម្មសិទ្ធិដី ជូនពួកគាត់ ព្រមទាំងត្រៀមរៀបចំបម្រុងដី១០% សម្រាប់ការប្រើប្រាស់រួមរបស់សហគមន៍

*ត្រូវបង្កើនការតាមដាន និងគ្រប់គ្រងសភាពការណ៍វិវត្តន៍ពាក់ព័ន្ធនឹងការកាន់កាប់ដីធ្លី របស់ប្រជាពលរដ្ឋនៅតាមតំបន់ការពារធម្មជាតិ និងគម្របព្រៃ ដើម្បីបង្ការ ទប់ស្កាត់កុំឲ្យ មាននិន្នាការរុករានទន្ទ្រានកាន់កាប់ដីព្រៃ ឬដីរដ្ឋដោយខុសច្បាប់បន្ថែមទៀត។ រាល់ការ រុករានទន្ទ្រានកាន់កាប់ថ្មីនូវដីព្រៃ ឬដីរដ្ឋដោយខុសច្បាប់ ត្រូវហាមឃាត់ដាច់ខាត និងត្រូវប្រើប្រាស់វិធានការរដ្ឋបាល និងវិធានការច្បាប់ឲ្យតឹងរឹង និងម៉ឺងម៉ាត់ដើម្បីទប់ស្កាត់

*ត្រូវខិតខំអប់រំ ណែនាំ និងបកស្រាយបំភ្លឺ អំពីស្ថានភាពនៃការកាន់កាប់ដីធ្លីរបស់ប្រជាពលរដ្ឋ និងឆន្ទៈរបស់រាជរដ្ឋាភិបាល ក្នុងការប្រឹងប្រែងដោះស្រាយដីធ្លី ជូនប្រជាពលរដ្ឋ ដើម្បីឲ្យពួកគាត់ចូលរួមសហការជាមួយអាជ្ញាធរពាក់ព័ន្ធ ដោយមិនត្រូវជឿតាមការញុះញង់ អូស ទាញរបស់មេខ្យល់ ឬជនខិលខូចមួយចំនួន ដែលឆ្លៀតឱកាសកេងយកផលប្រយោជន៍ ឬកេងចំណេញពីបញ្ហាដីធ្លីនេះ។ ករណីនេះ ត្រូវមានវិធានការទប់ស្កាត់ និងបង្ក្រាបមេខ្យល់ និងជនខិលខូចទាំងនោះ ស្របតាមច្បាប់ជាធរមាន

*ចំពោះទីតាំងដីធ្លីដែលមានទំនាស់ ត្រូវខិតខំសម្រុះសម្រួលដោះស្រាយដោយសន្តិវិធី តម្លាភាព សុចរិតភាព និងយុត្តិធម៌ ដោយត្រូវចុះជួបផ្ទាល់ ជាមួយប្រជាពលរដ្ឋ ដើម្បីស្រាវជ្រាវ ស្វែងយល់ឲ្យបានច្បាស់លាស់អំពីសាវតាដីទំនាស់ សាវតាប្រជាពលរដ្ឋ និងការទាមទារ តវ៉ារបស់ប្រជាពលរដ្ឋ ដើម្បីធ្វើជាមូលដ្ឋានបង្អែកសម្រាប់ទាញហេតុផលក្នុងការសម្រុះសម្រួល និងដោះស្រាយទំនាស់ដីធ្លីជូនប្រជាពលរដ្ឋ

*ត្រូវណែនាំដល់រដ្ឋបាលក្រុង ស្រុក ឃុំ សង្កាត់ ឲ្យធ្វើការបញ្ជាក់ ឬចុះហត្ថលេខាលើលិខិត ស្នាម ឬឯកសារនានាពាក់ព័ន្ធដីធ្លីឲ្យបានត្រឹមត្រូវតាមច្បាប់ បែបបទ នីតិវិធី និងគោលការណ៍ ណែនាំជាធរមាន។ ទន្ទឹមនេះ ត្រូវចាត់វិធានការច្បាប់ឱ្យបានម៉ឺងម៉ាត់ចំពោះបុគ្គលជាមន្ត្រី មានសមត្ថកិច្ចដែលបញ្ជាក់ ឬចុះហត្ថលេខាលើលិខិតស្នាម ឬឯកសារមិនស្របច្បាប់នានា ពាក់ព័ន្ធនឹងដីធ្លី

*ក្នុងការចាត់ចែងអនុវត្តការងារខាងលើនេះ រដ្ឋបាលខេត្តត្រូវរាយការណ៍ និងស្នើសុំយោបល់ ពីក្រសួងរៀបចំដែនដី នគរូបនីយកម្ម និងសំណង់ ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ស្របតាមសមត្ថកិច្ចទទួលខុសត្រូវរបស់ក្រសួងពាក់ព័ន្ធនីមួយៗ៕

(សូមអានបន្ត)

អ្នកធ្វើដំណើរទាំងអស់ចេញពីប្រទេសឡាវ ត្រូវតែមានលិខិតបញ្ជាក់សុខភាព, នេះបើតាមអាជ្ញាធរសុខាភិបាលឡាវ

(វៀងច័ន្ទ)៖ អ្នកដំណើរទាំងអស់ដែលចាកចេញពីប្រទេសឡាវ នឹងតម្រូវឱ្យមានលិខិតបញ្ជាក់សុខភាព មុនពេលធ្វើដំណើរទៅកាន់ប្រទេសផ្សេងទៀត ដើម្បីទប់ស្កាត់ការឆ្លងរាតត្បាត COVID-19។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នៅរសៀលថ្ងៃពុធ ទី០៨ ខែកក្កដា ឆ្នាំ២០២០។

គណៈកម្មាធិការជាតិសម្រាប់ការគ្រប់គ្រង និងបង្ការ COVID-19 នៃប្រទេសឡាវបានឱ្យដឹងថា រាល់អ្នកដំណើរទាំងអស់ ក្នុងនោះរួមទាំងអ្នកដំណើរជាប្រជាជននៅក្នុងស្រុក ត្រូវតែមានលិខិតបញ្ជាក់សុខភាពជាមុនសិន បើសិនជាពួកគេចង់ធ្វើដំណើរទៅកាន់ប្រទេសដទៃ។ គណៈកម្មាធិការនេះដដែល បានបន្ថែមទៀតថា អ្នកដំណើរដែលមិនមានលិខិតបញ្ជាក់សុខភាព អាចនឹងត្រូវបដិសេធចូលក្នុងប្រទេសជាគោលដៅរបស់ពួកគេ។

គួរបញ្ជាក់ថា បើក្រុមមន្ត្រីឡាវ ប្រជាជននៅក្នុងប្រទេសអាស៊ីអាគ្នេយ៍មួយនេះ អាចនឹងស្នើសុំធ្វើលិខិតបញ្ជាក់សុខភាព នៅតាមមន្ទីរពេទ្យទូទាំងប្រទេស។ ប៉ុន្តែអ្នកមានរោគសញ្ញាក្អក, ឈឺបំពង់ក, គ្រុនក្ដៅ ឬរោគសញ្ញាសង្ស័យពាក់ពា័ន្ធនឹង COVID-19 ឬក៏ធ្លាប់បានប៉ះពាល់ជាមួយមនុស្សឆ្លងជំងឺនេះ នឹងមិនត្រូវបានអនុញ្ញាត ឱ្យធ្វើលិខិតបញ្ជាក់នេះទេ ដោយត្រូវរង់ចាំរហូតការពិនិត្យសុខភាពរួចរាល់៕

(សូមអានបន្ត)

អភិបាលរាជធានីភ្នំពេញ ព្រមានចាត់វិធានការធ្ងន់ធ្ងរលើអ្នករំលោភប្រឡាយលូប្រាំ ក្នុងខណ្ឌមានជ័យ

(ភ្នំពេញ)៖ អភិបាលរាជធានីភ្នំពេញលោក ឃួង ស្រេង បានដាក់បញ្ជាទៅអាជ្ញាធរឲ្យមានវិធានការធ្ងន់ធ្ងរ ចំពោះអ្នកចាក់ដីរំលោភលើប្រឡាយលូប្រាំ ដោយចាក់ដីរំលោភប្រឡាយជាច្រើនម៉ែត្រ ពោលបើពួកគាត់មិនកាយដីរំលោភនេះចេញទេ រដ្ឋបាលរាជធានីភ្នំពេញនឹងមានវិធានការដោយនឹងធ្វើពាក្យបណ្ដឹងទៅតុលាការដើម្បីចាត់ការទៅតាមផ្លូវច្បាប់។

លោក ឃួង ស្រេង បញ្ជាក់ថា បើចៅសង្កាត់ និងខណ្ឌ មិនប្តឹងទៅតុលាការ លោកនឹងប្តឹងអាជ្ញាធរសង្កាត់ខណ្ឌវិញ។

លោក ឃួង ស្រេង បញ្ចេញប្រតិកម្មបែបនេះ ខណៈលោកដឹកនាំមន្ត្រីជំនាញ ចុះពិនិត្យស្ថានីយ៍បូមទឹកលូប្រាំ ដែលបានសាងសង់រួចរាល់ នៅសង្កាត់ស្ទឹងមានជ័យ៣ ក្នុងភូមិប្ញស្សី១ ខណ្ឌមានជ័យ នាព្រឹកថ្ងៃទី០៨ ខែកក្កដា ឆ្នាំ២០២០។

លោកបានបញ្ជាទៅអាជ្ញាធរខណ្ឌមានជ័យ ឲ្យកាយដីចេញពីប្រឡាយជាបន្ទាន់។ លោកបញ្ជាក់ថា «កម្មសិទ្ធិគាត់ត្រឹមណា ទុកត្រឹមហ្នឹងទៅគឺទុករយៈពេលមួយសប្តាហ៍ ដើម្បីឲ្យកាយដីចេញ។ បើគេមិនកាយទេ រៀបចំឯកសារដាក់បណ្តឹងទៅតុលាការ»។

លោក ឃួង ស្រេង ថ្លែងថា ប្រព័ន្ធបង្ហូរទឹកជាប្រភពរស់របស់ប្រជាពលរដ្ឋរាជធានីភ្នំពេញ។ សូមបញ្ជាក់ថា បើតាមសេចក្តីរាយការណ៍ពីអាជ្ញាធរខណ្ឌសង្កាត់ អ្នកមានលុយដែលចាក់ដីរំលោភចូល ប្រឡាយនេះឈ្មោះ ហាំង គង់ ដែលជាឈ្មួញរកស៊ីជីកដី និងដឹកដីលក់៕

(សូមអានបន្ត)